*🍂आवर्तने

*🌸श्रीराम जयराम जय जयराम!*

*🌸 जय सद्गुरु!!*

*🌸 चिंतन :०४.०१.२०१९*

🔥🔥🔥

*🍂आवर्तने म्हणजे काय? तर आवर्तन म्हणजे फिरणे, घुसळणे, पुन: पुन्हा करणे, घोकणे, अभ्यास. मूळ शब्द आवृत्ती. आवृत्ती म्हणजे गरगर फिरणे, पुन: पुन्हा करणे, अभ्यास. आवृत्ती – आवर्तन म्हणजे एकच वर्तुळ, एकच सूक्त, एकच स्तोत्र, एकच रचना पुन: पुन्हा म्हणणे. देवांची स्तुती ऋषीमुनींंच्या किंवा संतांच्या वाणीने करणे व त्याला प्रसन्न करण्याचा प्रयत्न करणे म्हणजे आवर्तन करणे किंवा एकापेक्षा अधिक तीन, अकरा, एकवीस, अठ्ठावीस, चौपन्न, एकशे आठ किंवा एक हजार वेळ सतत पाठ करणे म्हणजे आवर्तने. आवर्तने करावयाची कारणे म्हणजे जी इच्छा किंवा जी कामना मनात असेल ती पुरी व्हावी, सफल व्हावी, इच्छापूर्तीच्या प्रक्रियेत काही विघ्न, काही संकट व काही अडथळे येऊ नयेत म्हणून वारंवार त्याच त्याच शब्दांनी, त्याच त्याच सूक्तांनी वा शब्दांनी आपल्या ईष्ट देवतेची सतत, अखंड, अव्याहत, न कंटाळता स्तुती करून त्या देवतेला प्रसन्न करावयाचे असते. जप, आवर्तन, आवर्तने, एकादशिनी, लघुरुद्र, महारुद्र, अतिरुद्र, नवचंडी, शतचंडी, लक्षचंडी, सहस्रावर्तन, पवमान पंचसूक्ताचे पाठ, पारायण, सप्ताह हे सर्व प्रकार त्या त्या विशिष्ट देवतेला प्रसन्न करणे, तिची कृपा संपादन करणे, विघ्नसंकटांचे निवारण करणे किंवा सर्वांचे कल्याण-मंगल व्हावे यासाठी करावयाच्या उपासनापद्धती आहेत. आवर्तनाचा नेमका परिणाम काय होतो? आवर्तनामुळे सर्वप्रथम वाणी शुद्ध होते. नंतर शरीरशुद्धी होऊ लागते. मग बुद्धीवरील जडत्व दूर होण्यास प्रारंभ होऊन शेवटी मन ‘निर्मल’ होण्याची प्रक्रिया सुरू होते. मन एकदा पारदर्शी झाले (की जे सहजासहजी कधीच पारदर्शी होत नसते!) की मग आसक्ती, हव्यास, लोभ, हाव, वांछा, वासना यांचा लय होऊ लागतो किंवा आवर्तनांनी, अखंड पाठ करण्याने किंवा सततच्या पारायणाने, वारंवार केलेल्या स्तुतीने, स्तुती करणारा हळूहळू, पण निश्‍चितपणे मनाने ‘निर्मल’ होऊ लागतो. ‘निर्मल होणे’ म्हणजे मनातील वासनांचे ओझे नाहीसे होणे. विशेषत: मनातील, बुद्धीतील वाईट वासना, दुर्वासना, कुवासना, कुप्रवृत्ती, कुविचार हे प्रथम दूर व्हावे लागतात. त्यासाठी जसा सत्संग, संतसहवास, सद्ग्रंथांचे वाचन, श्रवण, मनन, कीर्तन, सदाचरण, धर्माचरण उपयोगी पडत असते तसेच आवर्तनांच्या सततच्या सरावाने मनाची शुद्धी कमी श्रमात व लवकर व्हायला जास्त मदत होते. आवर्तन-पारायणाने मनाची, बुद्धीची शुद्धी होते. मनाची शुद्धी होणे हीच ‘देवाची खरी कृपा’ असते. आवर्तने त्यासाठी प्रतिदिन करावयाची असतात.*🙏

*जय जय श्रीराम!! जय जय श्रीराम!!*